به‌پێی هه‌واڵی کوردپرێس، پاشنیوه‌ڕۆی ڕۆژی دووشه‌ممه 23/7/2018 نێچیرڤان بارزانی سه‌رۆک وه‌زیرانی هه‌رێمی كوردستان، پێشوازی له یان كۆبیش، نێرده‌ی تایبه‌تی سكرتێری گشتیی نه‌ته‌وه یه‌كگرتوووه‌كان بۆ عێراق كرد.
له كۆبوونه‌وه‌‌كه‌دا باس له ڕووداوه‌كانی ئه‌م دواییه‌ی عێراق و به‌تایبه‌تی گرژییه‌كانی باشووری عێراق كرا و كۆبیش جه‌ختی له‌وه كرده‌وه كه پێویسته لایه‌نه سیاسییه‌كانی عێراق ده‌ست به دیالۆگی جیددی بۆ پێكهێنانی كابینه‌ی نوێی حكوومه‌تی عێراق بكه‌ن و به‌ده‌م داواكارییه‌كانی هاووڵاتییانه‌وه بچن و جه‌ختیشی له ڕۆڵی كاریگه‌ری هه‌رێمی كوردستان له‌و گفتوگۆیانه و به‌شداری كردن له كابینه‌ی نوێی حكوومه‌تی عێراقدا كرده‌وه.
لای خۆیه‌وه نێچیرڤان بارزانى ئاماژه‌ی به پرۆسه‌ی سیاسیی عێراق و پرۆسه‌ی ژماردنه‌وه‌ی ده‌نگه‌كان به‌ده‌ست كرد كه كۆتایی هاتوووه و به پێویستی زانی دادگای فیدرال بڕیاری خۆی له‌سه‌ر دوائه‌نجامی هه‌ڵبژاردن بدات و په‌سه‌ندی بكات تا لایه‌نه سیاسییه‌كان زیاتر بپرژێنه سه‌ر گفتوگۆی پێكهێنانی كابینه‌ی نوێی حكوومه‌ت.
بارزانی ئاماده‌ییی هه‌رێمی كوردستانى بۆ هه‌ر هاریكارییێک له‌مباره‌یه‌وه نیشان دا تاكوو سه‌قامگیری بۆ عێراق بگه‌ڕێته‌وه و داواكاریی خۆپیشانده‌ران له چوارچێوه‌ی پرۆگرامی حكوومه‌ت له ئێستا و داهاتوودا جێگیر بكرێت و چاره‌سه‌ریان بۆ بدۆزرێته‌وه.
تاوتوێ كردنی بارودۆخی ناوچه‌كه به‌گشتی و چه‌ند بابه‌تێكی په‌یوه‌ندیدار به ڕۆژهه‌ڵاتی ناوه‌ڕاسته‌وه، لایه‌نێكی دیكه‌ی كۆبوونه‌وه‌كه بوو.
سه‌رچاوه: ماڵپه‌ڕی فه‌رمیی پارتی دیموکراتی کوردستان
کۆدی هه‌واڵنێر: 60103
Your Comment