کوردپرێس- ئاژانسی هه‌واڵی ڕۆیته‌رز له زاری به‌رپرسێکی وه‌زاره‌تی ده‌ره‌وه‌ی ئه‌مریکاوه بڵاوی کردوووه‌ته‌وه بڕیاره سبه‌ینێ هه‌ینی 20ی ته‌مووز شاندێکی هاوبه‌شی هه‌ر دوو وه‌زاره‌تی ده‌ره‌وه و خه‌زێنه‌ی ئه‌مریکا بگاته ئه‌نقه‌ره‌ی پایته‌ختی تورکیا.
ئه‌و به‌رپرسه‌ی وه‌زاره‌تی ده‌ره‌وه‌ی ئه‌مریکا ئاماژه‌ی به‌وه‌ش کردوووه: ئامانجی سه‌ردانه‌که گفتوگۆکردن ده‌بێت ده‌رباره‌ی گه‌ڕاندنه‌وه‌ی گه‌مارۆکانی سه‌ر ئێران.
ئه‌وه‌شی خستوووه‌ته ڕوو: شانده‌که‌ی ئه‌مریکا له‌گه‌ڵ لایه‌نه په‌یوه‌ندیداره‌کانی تورکیا و به‌رپرسانی وه‌زاره‌تی ده‌ره‌وه و داراییی ئه‌و وڵاته کۆ ده‌بنه‌وه.
شایانی باسه؛ له مانگی ئایاری ئه‌مساڵدا دۆناڵد تره‌مپ سه‌رۆکی ئه‌مریکا له ڕێککه‌وتنی ئه‌تۆمیی ئێران له‌گه‌ڵ چین و فه‌ڕه‌نسا و به‌ریتانیا و ڕوسیا و ئه‌ڵمانیادا کشایه‌وه که له ساڵی ٢٠١٥دا واژۆ کرابوو و به‌ڵێنی دا سزاکانی واشنتۆن به ته‌واوه‌تی بسه‌پێنێته‌وه به سه‌ر تاراندا و سزاکانیش که‌رتی وزه و پیترۆکیمیایی و که‌رته ئابوورییه‌کانی ئێران ده‌گرێته‌وه.
له چه‌ند ڕۆژی ڕابردووشدا دادگای دادی نێوده‌وڵه‌تی ڕای‌گه‌یاند: ئێران سکاڵای له دژی ئه‌مریکا تۆمار کردوووه به تۆمه‌تی پێشێل کردنی په‌یماننامه‌یێکی ساڵی ١٩٥٥ی نێوان هه‌ر دوو وڵات.
سه‌رچاوه: ئێن ئاڕتی
کۆدی هه‌واڵنێر: 60103
Your Comment