بەپێی هەواڵی کوردپرێس، هاوپەیمانێتییەکە لەبەیاننامەیەکدا دەڵێت هێزەکانیان لەمانگی ئابی ساڵی ٢٠١٤ تاوەکوو کانوونی یەکەمی ساڵی ٢٠٢٠، نزیکەی ٢٠ هەزار هێرشی ئاسمانییان دژ بە داعش ئەنجام داوە، کە لەئەنجامدا و بێ مەبەست ١٤١٠ کەسی مەدەنی کوژراون.
باس لەوەش کراوە کە لەوماوەیەدا هاوپەیمانی نێودەوڵەتی و هێزە هاوبەشەکان توانیویانە ١١٠ هەزار کیلۆمەتر چوارگۆشە لەژێردەستی ڕێکخراوی تیرۆریستی داعش لە عێراق و سووریا دەربهێنن و ٧،٧ ملیۆن کەس لەستەم و سەرکەوتکاریی داعش ڕزگار بکەن.
لە بەیاننامەکەدا جەخت کراوەتەوە لەسەر ئەوەی کە هاوپەیمانی نێودەوڵەتیی بەردەوام دەبێت لەکارکردن لەگەڵ هێزە هاوبەشەکان لە عێراق و سوریا، تاوەکوو ڕێگە بە داعش نەدرێت دەست بەسەر هیچ ناوچەیێکی تردا بگرێت و هیچ سەرچاوەیێکی داهاتیشی بۆ دووبارە سەرهەڵدانەوە دەستنەکەوێتەوە.
لە مانگی ئابی ٢٠١٤ هاوپەیمانێتییەکی نێودەوڵەتی بە سەرکردایەتی ویلایەتە یەکگرتووەکانی ئەمریکا بە ئەندامێتی زیاتر لە ٢٠ وڵات بۆ شەڕی داعش و ڕاگرتنی پێشڕەوییەکانی لە عێراق و سووریا پێکهێنرا، ئەویش پاش ئەوەی ئەو ڕێکخراوە تیرۆریستییە دەستی بەسەر ناوچە بەرفراوانی ئەو دوو وڵاتە گرت.
سەرچاوە: شارپرێس
کۆدی هەواڵنێر: 60113
Your Comment