به‌پێی هه‌واڵی کوردپرێس، یه‌كگرتوو و بزووتنه‌وه هاوپه‌یمانێتییه‌كیان به ناوی (به‌ره‌و ئیسڵاح) بۆ هه‌ڵبژاردنی په‌رله‌مانی كوردستان تۆمار كرد و ئه‌مه‌ش له كاتێكدایه پێشتر هه‌ر سێ لایه‌نی ئیسلامی (كۆمه‌ڵ و یه‌كگرتوو و بزووتنه‌وه) به‌نیاز بوون به‌ره‌یێكی ئیسلامی بۆ به‌شداری كردن له هه‌ڵبژاردن دروست بكه‌ن.
سه‌لیم كۆیی ئه‌ندامی سه‌ركردایه‌تیی كۆمه‌ڵی ئیسلامی ده‌ڵێت: ئێمه به‌شداری له‌و هاوپه‌یمانێتییه ناكه‌ین كه له نێوان بزووتنه‌وه و یه‌كگرتوو پێكهێنراوه، هه‌رچه‌نده قسه‌شیان له‌گه‌ڵ كردووین به‌ڵام بۆمان نه‌گونجا به‌شداری بكه‌ین و ئه‌وانیش لیسته‌كه‌یان تۆمار كردوووه.
ناوبراو وتیشی: "ئه‌وان پێشتر هاوپه‌یمانێتییه‌كیان هه‌بوووه و كۆمه‌ڵێک ڕێككه‌وتنیان له نێواندا هه‌یه به‌ڵام ئێمه چاوه‌ڕوانی ئه‌نجامی تانه‌كانی به‌غدا ده‌كه‌ین و سه‌رباری ئه‌وه‌ش پێكهێنانی هاوپه‌یمانی له نێوان چه‌ند لایه‌نێكدا پێویستی به بیركردنه‌وه هه‌یه."
ئه‌ندامه‌كه‌ی سه‌ركردایه‌تیی كۆمه‌ڵ ده‌ڵێت: "ده‌ستخۆشیمان لێكردوون بۆ پێكهێنانی ئه‌و هاوپه‌یمانێتییه به‌ڵام له ده‌ره‌وه‌ی ئه‌وه‌ش هه‌ر برای یه‌كترین و هاوكاری یه‌كتر ده‌بین.."
سه‌لیم کۆیی ئاماژه‌ی به‌وه‌ش كرد پێناچێت له نێوان لایه‌نه ناڕازییه‌كانیشدا هیچ هاوپه‌یمانێتییێک بكرێت و هه‌ریه‌كه‌یان به جیا به‌شداری له هه‌ڵبژاردنه‌كانی داهاتوودا ده‌كه‌ن.
سه‌رچاوه: تۆڕی هه‌واڵی سلێمانی (SNN)
کۆدی هه‌واڵنێر: 60103
Your Comment