کوردپرێس- ڕۆژی سێشه‌ممه 19ی حوزه‌یران ئاژانسی هه‌واڵی سانای سووریا له زاری سه‌رچاوه‌یێکی فه‌رمی وه‌زاره‌تی ده‌ره‌وه‌ی ئه‌و وڵاته‌وه بڵاوی کرده‌وه سووریا ئیدانه و ناڕه‌زاییی توندی خۆی ده‌رده‌بڕێت سه‌باره‌ت به هاتنه ناوه‌وه‌ی سوپای تورکیا و ئه‌مریکا بۆ نزیکی شاری مه‌نبه‌ج.
سه‌رچاوه‌که‌ی وه‌زاره‌تی ده‌ره‌وه‌ی سووریا ئاماژه‌ی به‌وه‌ش کردوووه هاتنی سوپای تورکیا و ئه‌مریکا له چوارچێوه‌ی ده‌ستدرێژییه‌کانی تورکیا و ئه‌مریکایه که به‌رده‌وام ده‌کرێته سه‌ر سه‌روه‌ری و یه‌کپارچه‌ییی خاکی سووریا.
وه‌زاره‌تی ده‌ره‌وه‌ی سووریا داوای له کۆمه‌ڵی نێوده‌وڵه‌تی کردوووه ئیدانه‌ی ئه‌و هه‌ڵسوکه‌وتانه‌ی تورکیا و ئه‌مریکا بکات له ناو خاکه‌که‌یدا و جه‌ختیشی کردوووه‌ته‌وه سوپای سووریا به‌رده‌وام ده‌بێت له‌سه‌ر ڕزگار کردنی ته‌واوی خاکی سووریا له بوونی هه‌ر بیانییێک.
ئه‌و ناڕه‌زایه‌تییانه‌ی حکوومه‌تی سووریا له کاتێکدایه ڕۆژی 19ی حوزه‌یران سوپای تورکیا ڕای‌گه‌یاند سه‌ربازه‌کانی ئه‌مریکا و تورکیا به شێوه‌یێکی سه‌ربه‌خۆ جموجووڵه‌کانی خۆیان ده‌ست پێکردوووه له چوارچێوه‌ی ئه‌و نه‌خشه‌ڕێگایه‌ی که پێشتر له‌سه‌ری ڕێککه‌وتن سه‌باره‌ت به شاری مه‌نبه‌ج.
به گوێره‌ی نه‌خشه‌ڕیگاکه که ئه‌مریکا و تورکیا له‌سه‌ری ڕێککه‌وتوون ده‌بێت یه‌کینه‌کانی پاراستنی گه‌ل (یه‌په‌گه) له مه‌نبه‌ج بکشێنه‌وه و ته‌نها چه‌کداره‌کانی ناوخۆییی شاره‌که له چوارچێوه‌ی هێزه‌کانی سووریای دیموکراتیدا بمێننه‌وه و به وته‌ی لێپرسراوانی تورکیا له دوو ڕۆژ له‌مه‌وبه‌ره‌وه هێزه‌کانی یه‌په‌گه ده‌ستیان به کشانه‌وه کردوووه به‌ڵام یه‌په‌گه خۆی ئه‌و لێدوانانه‌ی تورکیای ڕه‌ت کرده‌وه.
سه‌رچاوه: ئێن ئاڕتی
کۆدی هه‌واڵنێر: 60103
Your Comment