به‌پێی هه‌واڵی کوردپرێس، نزار مه‌حموود ئه‌ندامی جڤاتی نیشتیمانیی گۆڕان ده‌ڵێت: "تا ئێستا پارتی به ڕه‌سمی داوای یه‌كڕیزی له ئێمه نه‌كردوووه به‌ڵام ناكرێت دوای ئه‌و هه‌موو پێشێلكارییه‌ی له هه‌ڵبژاردنه‌كاندا كراوه ئێستا باس له یه‌كڕیزی و یه‌كده‌نگیی كورد له به‌غدا بكرێت."
ناوبراو وتیشی: "ناكرێت هه‌ركات پارتی پڕۆژه‌ی هه‌بێت ئێمه له‌گه‌ڵ پڕۆژه‌كه‌ی هه‌ماهه‌نگ بین و پشتیوانی لێبكه‌ین، له كاتێكدا نێو ماڵی كورد له ناوخۆشدا یه‌كخراو نه‌بێت، ده‌بێت ئه‌وه بزانرێت ئێمه‌ش وه‌ک گۆڕان پڕۆژه‌ی تایبه‌ت به خۆمان سه‌باره‌ت به كورد و گه‌ڕانه‌وه بۆ به‌غدا هه‌یه."
به وته‌ی به‌رپرسه‌كه‌ی گۆڕان ئه‌وان چاوه‌ڕوانی بڕیاری كۆتایی ده‌كه‌ن سه‌باره‌ت به ده‌رئه‌نجامی هه‌ڵبژاردن و شێوازی مامه‌ڵه كردن له‌گه‌ڵ ئه‌نجامه‌كان "دوای ئه‌وه‌ش ئه‌گه‌ر بڕیاری به‌شداری كردن له پرۆسه‌ی سیاسی له به‌غدا بده‌ین، هه‌ر ئه‌وكاتیش بڕیار ده‌ده‌ین كه له‌گه‌ڵ یه‌كێتی و پارتی كۆبوونه‌وه ئه‌نجام بده‌ین یاخود نا."
نزار مه‌حموود ئه‌وه‌شی وت: "دوای ئه‌وه‌ی ده‌رئه‌نجامی هه‌ڵبژاردن یه‌كلا كرایه‌وه به تایبه‌ت كه میكانیزمی ئه‌نجامه‌كان چۆن ئه‌ژمار ده‌كرێت ئه‌وكات وه‌ڵامی پڕۆژه‌ی پارتی و هه‌ر لایه‌نێكی دیكه‌ش ده‌ده‌ینه‌وه به‌ڵام له ئێستادا هیچ بڕیارێک ناده‌ین."
سه‌رچاوه: تۆڕی هه‌واڵی سلێمانی (SNN)
کۆدی هه‌واڵنێر: 60103
Your Comment