به‌پێی هه‌واڵی کوردپرێس، به ناوی په‌روه‌ردگاری به‌خشنده و میهره‌بانه‌وه
ئه‌ی گه‌لی عێراقی دلێر
سڵاوی خوداتان لێبێت
به‌بۆنه‌ی هاتنه‌وه‌ی جه‌ژنی پیرۆزی ره‌مه‌زانه‌وه كه ماڵئاوایی ده‌كه‌ین له مانگی به‌زه‌یی و لێبوردن، مانگی ره‌مه‌زانی به‌ڕێز، گه‌رمترین پرۆزبایی پێشكه‌ش ده‌كه‌م به رۆڵه‌كانی گه‌لی عێراقمان به هه‌موو پێكهاته‌كانییانه‌وه و ته‌واوی موسوڵمانان له جیهاندا، داوا له په‌روه‌ردگاری مه‌زن ده‌كه‌م رۆژوه‌كانتان قبوڵ بكات و رۆژه‌كانتان بكاته جه‌ژن و بێوه‌یی و سه‌لامه‌تی، هاوكات له سایه‌ی گه‌وره‌یی خۆیه‌وه رۆژه پیرۆزه‌كانمان بكاته ده‌سپێكێكی مه‌زن و سه‌رتاسه‌ری بۆ به‌هێزكردنی هه‌نگاوه‌كانمان له به‌ره‌وپێشچوونی پێكه‌وه به‌ره‌و بنیاتنانی ئاینده‌یێكی ئۆقره و تاوسه‌ند و بۆ گه‌له‌كه‌مان له‌سه‌ر بناغه‌ی هاوكاری و لێتێگه‌یشتن و كاری بنیاتنه‌ری هاوبه‌ش.
ئه‌م بۆنه پیرۆزه به‌ده‌رفه‌ت ده‌زانم كه به‌وپه‌ڕی هه‌ستی پێزانینه‌وه سڵاو و پێزانینیم پێشكه‌ش بكه‌م به قاره‌مانه نه‌به‌زه‌كانمان له رۆڵه‌كانی هێزه چه‌كداره‌كانمان به هه‌موو رێز و پێكهاته‌كانیانه‌وه له به‌رامبه‌ر ئه‌و سه‌ركه‌وتنه مه‌زنانه‌یان كه به‌ده‌ستیان هێناوه به‌سه‌ر تێرۆردا، قوربانی زۆر و زه‌وه‌ندیان پێشكه‌ش كردوووه و داستانی قاره‌مانیه‌تییان تۆمار كردوووه له جه‌نگی پیرۆزی گه‌له‌كه‌مان دژی پاشماوه‌كانی تێرۆر، هه‌ر به‌م بۆنه پیرۆزه‌وه سڵاوم بۆ خانه‌واده‌ی به‌ڕێزی شه‌هیدان كه ئه‌وان و ئێمه‌ش هه‌موومان شانازی ده‌كه‌ین كه رۆڵه‌كانیان سه‌ر و ماڵیان به‌خت كردوووه له پێناوی سه‌ربه‌رزی و ئازادیدا، داوای سۆز و به‌زه‌یی یه‌زدان ده‌كه‌ین بۆ شه‌هیدان و چاك بوونه‌وه‌ش بۆ برینداره قاره‌مانه‌كان.. هاوسۆزی ده‌رده‌بڕم بۆ ئه‌و خێزانانه‌ی كه تا ئێستاش به‌ده‌ست سه‌ختییه‌كانی ئاواره‌بوونه‌وه ده‌ناڵێنن، نزا و هه‌وڵ و هه‌نگاوی هه‌مووان بۆ ئه‌وه‌یه كه به‌هه‌موو توانایاكه‌وه كار بكه‌ین بۆ ده‌سته‌به‌ر كردنی گه‌ڕانه‌وه‌ی سه‌ربه‌رزانه و سه‌لامه‌تییان بۆ زێد و ماڵ و حاڵیان.
گه‌له‌كه‌مان كه هه‌لومه‌رجی نائاسایی و دژواری تێپه‌ڕاند، گه‌له‌كه‌مان به تێپه‌ڕاندنی هه‌لومه‌رجه نائاسایی و دژواره‌كه‌ی ئه‌م ساڵانه‌ی دوایی وره‌یێكی نه‌گۆڕی سه‌لماند بۆ به‌رده‌وام بوون له كاروانی بنیاتنانی عێراقی دیموكراسی مۆدێرن و پابه‌ندبوون به یه‌كگرتوییه‌كه‌ی، لێره‌وه داوا له عێراقییه‌كان ده‌كه‌ین هه‌وڵی جدی بخه‌نه‌كار له پێناوی چاره‌سه‌ركردنی كێشه‌كانمان له‌ڕێی لێكتێگه‌یشتنی زیاتر و دیالۆگی پۆزه‌تیڤ و وه‌لانانی دوبه‌ره‌كی و لێكدابڕان و كاركردنی جدی له پێناوی پاراستنی ئۆقره‌یی سیاسی و ئاسایش و هه‌ورازخستنی پره‌نسیبی هاووڵاتی بوون و چاره‌سه‌ركردنی هه‌موو كێشه هه‌ڵپه‌سێراوه‌كان به هه‌ست كردن به لێپرسراویه‌تی و دادپه‌روه‌ری له‌سه‌ر بناغه‌ی ده‌ستوور و پابه‌ندبوون به قانوونه‌كان به‌و جۆره‌ی یه‌كڕیزی نیشتمانی قووڵ ده‌كاته‌وه و پێشكه‌وتن به‌ره‌و سه‌رله‌نوێ ئاوه‌دان كردنه‌وه‌ی عێراق و پاراستنی مافه‌كانی له سوودوه‌رگرتن له سه‌رچاوه‌كانی ئاو بۆ ماوه‌یێكی درێژخایه‌ن و به شێوه‌یێكی ستراتیژی و به‌هێزكردنی پێگه‌كه‌ی له‌سه‌ر هه‌ردوو ئاستی ناوچه‌كه و جیهان.
په‌روه‌ردگار رۆژه‌كانمان بكاته جه‌ژن و خۆشی و ئاشتی و خۆشویستن و هیوا.
جه‌ژنتان پیرۆزو هه‌موو ساڵێک عێراق و عێراقییه‌كان و نه‌ته‌وه‌ی ئیسلام و هه‌موو مرۆڤایه‌تی هه‌ر له خۆشیدا بن.
فوئاد مه‌عسووم
سه‌رۆک كۆمار
کۆدی هه‌واڵنێر: 60104
Your Comment