به‌پێی هه‌واڵی کوردپرێس، سه‌عید كاكه‌یی ئه‌ندامی ئه‌نجومه‌نی سڕكراوی كۆمیسیارانی سه‌ر به ‌كۆمیسیۆنی باڵای هه‌ڵبژاردنه‌كانی عێراق ده‌ڵێت: "ئه‌نجومه‌نی كۆمیسیاران له ‌ئێستادا كاره‌كانی سڕكراوه‌‌ و ڕێگه‌یان پێنادرێت بچنه‌ نێو باڵه‌خانه‌ی كۆمیسیۆنه‌وه‌ تا ئه‌و كاته‌ی كاری هه‌ژماركردنه‌وه‌ی ده‌نگه‌كان به ‌ده‌ست ته‌واو ده‌بێت."

سه‌عید كاكه‌یی ئاماژه‌ی به‌وه‌ش دا به‌هۆی هه‌ڵوه‌شاندنه‌وه‌ی ئه‌نجامه‌كانی هه‌ڵبژاردنی ئاواره‌كان‌ و ده‌ره‌وه‌ی وڵات و هه‌روه‌ها ڕه‌ت كردنه‌وه‌ی ئه‌نجامه‌كانی ده‌نگدانی تایبه‌ت له‌ هه‌رێمی كوردستان نزیكه‌ی 20 كاندیدی سه‌ركه‌وتوو له‌و دۆخه‌ نوێیه‌ی هاتوووه‌ته‌ ئاراوه‌ ده‌كه‌ون و له‌ بری ئه‌وان 20 كاندیدی دیكه‌ شوێنیان ده‌گرنه‌وه‌.

سه‌عید كاكه‌یی له‌باره‌ی ئه‌و ماوه‌یه‌ی پێویسته‌ بۆ ڕاهێنانی كارمه‌ندانی هه‌ژماركردنه‌وه‌ی ده‌نگه‌كان به ‌ده‌ست ده‌شڵێت: "ئه‌و كاره‌ دوو بۆ سێ ڕۆژی پێویست ده‌بێت تا ئه‌و كه‌سانه‌ی به ‌ئه‌نجامدانی پڕۆسه‌كه‌ هه‌ڵده‌ستن و ڕێنمایی‌ و ڕاهێنانی پێویست له‌وباره‌یه‌وه‌ وه‌ربگرن."

سه‌رچاوه‌: شارپرێس

کۆدی هه‌واڵنێر: 60103