به‌پێی هه‌واڵی کوردپرێس، محه‌مه‌د حاجی عومه‌ر لێپرسراوی كۆمیته‌ی قه‌ره‌ته‌په‌ی‌ یه‌كێتیی‌ نیشتیمانیی‌ كوردستان به ‌SNNی‌ ڕاگه‌یاند: "شه‌وی ژماره‌یێک چه‌كداری گرووپی‌ تیرۆریستیی‌ داعش په‌لاماری‌ هه‌ر دوو گوندی (گڵابادو ئاشتۆكان)یان دا، گوندی گڵاباد كوردنیشن و ئاشتۆكانیش توركمانییه‌، سه‌ره‌تا داعش گه‌مارۆی گونده‌كه‌یاندا".

وتیشی‌: "دواتر له ‌لایه‌ن چه‌ند كه‌سێكی‌ خۆبه‌خشی سنووره‌كه‌وه‌ پۆلیسی ناحیه‌ی‌ جه‌باره‌ ئاگادار كرایه‌وه‌، دوای‌ ئه‌وه‌ی‌ پۆلیس گه‌یشته‌ ئه‌و دوو گونده‌، چه‌كدارانی‌ داعش چه‌ند گوله‌ هاوه‌نێكیان ئاراسته‌ی‌ گوندی ئاشتۆكان كرد به‌و هۆیه‌شه‌وه‌ ژماره‌یێک هاووڵاتیی گونده‌كه‌ بریندار بوون".

به‌رپرسه‌كه‌ی‌ یه‌كێتیی ئاشكراشی كرد: له ‌كاتی‌ چوونی‌ هێزه‌كانی‌ پۆلیسی ناحیه‌ی‌ جه‌باره‌ بۆ ئه‌و دوو گونده‌ بۆمبێكی‌ چێندراو به‌و هێزه‌دا ته‌قیه‌وه‌ و سه‌ره‌نجامیش ئه‌فسه‌رێكی‌ پۆلیسی بنكه‌ی‌ جه‌باره‌ كه‌ كورده‌، شه‌هید بوو.

ئه‌وه‌شی‌ ڕوون كرده‌وه‌: دوای‌ به‌رده‌وامی‌ ڕووبه‌ڕووبوونه‌وه‌ی‌ چه‌كدارانی‌ داعش و پۆلیسی جه‌باره‌ له‌ سنووری‌ ئه‌و دوو گونده‌، دواتر فه‌وجی‌ سێی‌ لیوای‌ 136ی گه‌رمیانی‌ یه‌كێتیی نیشتیمانیی‌ كوردستان به ‌ئاراسته‌ی‌ ئه‌و دوو گونده‌ جووڵه‌یان پێكرا، دوای‌ زیاتر له ‌یه‌ک كاتژمێر ڕووبه‌ڕووبوونه‌وه‌ چه‌كدارانی‌ داعش هه‌ڵاتن".

به‌رپرسه‌كه‌ی‌ یه‌كێتیی له‌ قه‌ره‌ته‌په‌ ئه‌وه‌شی خسته‌ڕوو: "ئێستا دۆخی‌ ناوچه‌كه‌ كۆنترۆڵ كراوه‌، له‌دوای‌ قاره‌مانێتیی‌ خه‌ڵكی‌ گونده‌كه ‌و هێزه‌كانی‌ پۆلیس و چوونی‌ هێزه‌كه‌ی‌ یه‌كێتیش، چه‌كدارانی‌ داعش به‌ره‌و سنووری‌ حه‌مرین و غه‌ڕه‌ هه‌ڵاتوون و نه‌یانتوانیوه‌ زیاتر بمێننه‌وه‌".

کۆدی هه‌واڵنێر: 60104