بەپێی هەواڵی کوردپرێس، ئەمڕۆ رێپێدراوانی هاوپەیمانی و گۆڕان لە شاری بەغدا سكاڵاكانیان لەسەر ساختەكارییەكانی هەڵبژاردنی ئەنجومەنی نوێنەرانی عێراق پێشكەش بە كۆمسیۆنی باڵای سەربەخۆی هەڵبژاردانی عێراق كرد.

رێبوار كەریم، وتەبێژی هاوپەیمانیی دیموكراسی و دادپەروەری لە كۆنگرەكەدا رایگەیاند: "پێشكەش كردنی بەڵگەی ساختەكارییەكان كاری زۆرمان لەسەر كرد، بەڵام درەنگ بەڵگەكانمان دەست كەوت و كۆمسیۆن دەستی دەستیان پێكردین، بەڵام ئێمە بەڵێنمان بە خەڵک دابوو و زۆر بەوردی كارمان لەسەر بابەتەكە كردووە هەرچوار لایەنمان كارمان لەسەر كرد".

ناوبراو ئاماژەی بەوەش كرد: "هەموو ئەو دەنگە پووچەڵانەی هەڵبژاردنەكانی 12ی مانگ لە هەرێم چووە بۆ لایەنی دەسەڵات، دەشتوانین بڵێین تەزویرەكان بە جۆرێک لە جۆرەكان كۆمیدیایە و لە پارێزگای سلێمانی بە یەک كۆد چەندین هەزارجار دەنگ بۆ شەش كاندیدی دەسەڵات دراوە".

12ی ئەم مانگە، هەڵبژاردنی ئەنجومەنی نوێنەرانی عێراق لەسەرتاسەری عێراق و هەرێمی كوردستان بەڕێوەچوو، بەڵام هەندێک لە لایەنە سیاسیەكانی بەشدار لە پڕۆسەكە لە عێراق و هەرێم رایدەگەیێنن، بەهۆی دەستكاری كردنی دەنگەكانەوە ئەنجامەكانی هەڵبژاردنەكە رەت دەكەنەوە.

کۆدی هەواڵنێر: 60113