به‌پێی هه‌واڵی کوردپرێس، سه‌لیم شووشكه‌یی ئه‌ندامی فراكسیۆنی كۆمه‌ڵی ئیسلامی له ئه‌نجومه‌نی نوێنه‌ران به SNNی ڕاگه‌یاند: "سه‌ركردایه‌تیی كۆمه‌ڵی ئیسلامی به‌رپرسه له‌وه‌ی بڕیاری یه‌كلاكه‌ره‌وه له‌باره‌ی به‌شداری له پرۆسه‌ی سیاسیی عێراق ده‌دات به‌ڵام پێم وایه كشانه‌وه له پڕۆسه‌ی سیاسی كارێكی هه‌ڵه‌یه و خۆكوژییه".
ناوبراو وتیشی: "پێشتر سوننه‌كان كه‌وتنه ئه‌و هه‌ڵه‌یه‌وه و ئێستاش ئه‌گه‌ر ئێمه چه‌ند كورسیێکمان خوراوه ئه‌وه‌ی به ده‌ستیش هاتوووه ڕاده‌ستی بكه‌ین نه مه‌نتقی و نه یاسایییه چوونكه خه‌ڵک كه ده‌نگی به‌و لایه‌نانه داوه بۆ ئه‌وه نه‌بوووه بایكۆتی پرۆسه‌كه بكه‌ن به‌ڵكوو بۆ جێبه‌جێ كردنی داخوازییه‌كانیان بوووه".
سه‌لیم شووشکه‌یی كشانه‌وه له پرۆسه‌ی سیاسیش ڕه‌ت ده‌كاته‌وه و ده‌ڵێت: "هیچ كاریگه‌رییێک دروست ناكات و ئه‌و كورسییانه‌ش به چۆڵی نامێننه‌وه و ئه‌نجومه‌نی نوێنه‌ران كه له328 ئه‌ندام پێكدێت و هه‌ر كۆبوونه‌وه‌یێک جاری وا هه‌یه زیاتر له 60 په‌رله‌مانتار نه‌هاتوون و پێوه‌شی دیار نه‌بوووه تا به‌هۆی شه‌ش كه‌سه‌وه پێوه‌ی دیار بێت".
ناوبراو داواش ده‌كات لایه‌نه ناڕازییه‌كانی ئه‌نجامه‌كانی هه‌ڵبژاردن ڕێگه یاسایییه‌كانی تانه و تۆمار كردنی سكاڵا له كۆمیسیۆنی هه‌ڵبژاردنه‌كان بگرنه‌به‌ر و وتی: "ئه‌گه‌ر ئه‌وه‌ش ئه‌نجامی نه‌بوو دیاره ئه‌و قۆناغه‌ی عێراق پێیدا تێپه‌ڕ ده‌بێت ماویه‌تی بۆ پرۆسه‌ی دیموكراسی به‌ڵام به گشتی كشانه‌وه له پڕۆسه‌ی سیاسی كارێكی خۆكوژی و هه‌ڵه‌یه و هیچ خزمه‌تێک ناكات".
کۆدی هه‌واڵنێر: 60103
Your Comment