به‌پێی هه‌واڵی کوردپرێس، ڕۆژی شه‌ممه 26ی ئایار جڤاتی نیشتیمانیی بزووتنه‌وه‌ی گۆڕان کۆبوونه‌وه‌ی خۆی له‌سه‌ر پرسی به‌شداری کردنی بزووتنه‌وه‌که له په‌رله‌مانی داهاتووی عێراق ئه‌نجام دا و دواتر ڕاگه‌یێندراوێکی بڵاو کرده‌وه و تێدا ئاماژه‌یان به ئه‌وه کرد "ئه‌و ساخته‌کارییه ڕێکخراوه‌ی یه‌کێتی و پارتی که به‌و هۆیه‌وه ده‌نگی سه‌دان هه‌زار هاووڵاتی کوردستانیان دزی جارێکی‌تریش سه‌لماندیان که له پێناوی به‌رژه‌وه‌ندیی حیزبی خۆیان سڵ له هیچ ڕه‌فتارێک ناکه‌نه‌وه و به‌و ڕه‌فتاره‌یان هاووڵاتییانی کوردستانیان ڕق ئه‌ستوورتر کرد به‌رامبه‌ر ئه‌و ده‌سه‌ڵاته شکست‌خواردوو و خۆسه‌پێنه".
له به‌شێکی‌تری ڕاگه‌یێندراوه‌که‌دا جڤاتی نیشتیمانیی بزووتنه‌وه‌ی گۆڕان ئه‌وه‌ش ده‌خه‌نه ڕوو سه‌رتاپای هه‌ڵبژاردنه‌کان ڕه‌ت ده‌کاته‌وه و له هه‌مان کاتدا چاوه‌ڕێی ڕێکاره یاسایییه‌کان و هه‌وڵه سیاسی و دیپلۆماسییه‌کانن بۆ دووباره کردنه‌وه‌ی هه‌ڵبژاردن له پارێزگاکانی هه‌رێم و پارێزگاکانی که‌رکووک و مووسڵ یان ڕاست کردنه‌وه‌ی ئه‌نجامه‌کان و گێڕانه‌وه‌ی ده‌نگه ڕاسته‌قینه‌کانی هاووڵاتییانی کوردستان و به پێچه‌وانه‌وه هه‌موو بژارده‌یێک له به‌رده‌م بزووتنه‌وه‌ی گۆڕان کراوه‌یه به بڕیاری بایکۆتی سیاسیشه‌وه به ڕاوێژ له‌گه‌ڵ یه‌کگرتووی ئیسلامی، کۆمه‌ڵی ئیسلامی، هاوپه‌یمانی بۆ دیموکراسی و دادپه‌روه‌ری، بزووتنه‌وه‌ی ئیسلامی و حیزبی شیووعی کوردستان.
جڤاتی نیشتمانیی بزووتنه‌وه‌ی گۆڕان داواش له هه‌موو هێز و لایه‌نه کوردستانییه نیشتمانییه‌کان ده‌کات به‌ره‌یێکی فراوان دروست بکه‌ن بۆ گۆڕانکاری ڕیشه‌یی له هه‌رێمی کوردستان.
باس له‌وه‌ش ده‌کات دوا به دوای هه‌وڵه‌کانی گۆڕان و هێزه کوردستانییه‌کانی‌تر بۆ ساخ کردنه‌وه‌ی ده‌نگه‌کانی هاووڵاتییان چه‌ندین هێز و لایه‌نی سیاسیی عێراقی و نه‌ته‌وه یه‌کگرتوووه‌کان داوای لێکۆڵینه‌وه‌ی به‌په‌له ده‌که‌ن له ساخته‌کارییه‌کانی پڕۆسه‌ی هه‌ڵبژاردن. هه‌روه‌ها دروست کردنی لیژنه‌ی لێکۆڵینه‌وه له‌لایه‌ن حکوومه‌تی عێراقه‌وه هه‌نگاوێکی ئه‌رێنی و دانپێدانانه به ساخته‌کاری له هه‌ڵبژاردنه‌کاندا.
سه‌رچاوه: ئێن ئاڕتی
کۆدی هه‌واڵنێر: 60103
Your Comment