به‌پێی هه‌واڵی کوردپرێس، ئاری جه‌لال سه‌رپه‌رشتیاری فیدراسیۆنی سه‌رتاسه‌ری په‌نابه‌رانی عێراق له هه‌رێمی كوردستان، بهSNN ی راگه‌یاند: له‌ساڵی 2018 هه‌شت په‌نابه‌ری تری كوردی هه‌رێمی كوردستان دیپۆرتی سووریا و گرووپه تیرۆریسته‌كانی ئه‌و وڵاته كراون، ئه‌گه‌ر به هه‌وڵی هێزه‌كانی دژه تیرۆریش نه‌بوایه بۆ ئازادكردنیان، ئه‌وه ژیانیان له مه‌ترسیدا بوو.
وتیشی: "حكوومه‌تی توركیا به‌رده‌وام ده‌بێت له‌ڕاده‌ست كردنی هاووڵاتییانی هه‌رێمی كوردستان به گرووپه تیرۆریستیه‌كان و ئه‌و كاره‌ش به‌ئه‌نقه‌ست ده‌كات، چوونكه پێش ئه‌وه‌ی دیپۆرت بكرێنه‌وه، ئێمه كۆپی پاسپۆرتی ئه‌و هاووڵاتییانه‌یان بۆ ده‌نێرین و راسته‌وخۆش قسه‌یان له‌گه‌ڵدا ده‌كه‌ین، به‌ڵام سودی نییه".
ئاری جه‌لال بانگه‌وازێک ئاڕاسته‌ی هاووڵاتییان و په‌نابه‌ران ده‌كات و داوایان لێده‌كات نه‌كه‌ونه داوی قاچاخچێكان و خۆیان به هاووڵاتیی سوری له قه‌ڵه‌م نه‌ده‌ن و وتی: "پێویست ناكات ناسنامه‌ی خۆیان بگۆڕن بۆ سوری، چونكه ئێستا پۆلیس توركیا هاووڵاتییانی ئه‌و وڵاته‌ش دیپۆرت ده‌كاته‌وه".
راشی‌گه‌یاند: وێڕای ئاگاداركردنه‌وه‌یان تا ئێستا نه حكوومه‌تی هه‌رێم و نه حكوومه‌تی عێراق له‌سه‌ر ئه‌و حاڵه‌ته نه‌هاتونه‌ته ده‌نگ و نه‌یانتوانیوه رێگری له توركیا بكه‌ن.
کۆدی هه‌واڵنێر: 60104
Your Comment