به‌پێی هه‌واڵی کوردپرێس، محه‌مه‌د عوسمان ئه‌ندامی ئه‌نجومه‌نی نوێنه‌رانی عێراق به SNNی ڕاگه‌یاند: وڵاتانی ده‌وروبه‌ر ده‌ستی باڵایان هه‌یه له داڕشتنه‌وه‌ی به‌رنامه و سیاسه‌تی عێراق به جۆرێک به‌غدا هیچ ڕۆڵێكی نه‌ماوه له سیاسه‌تی ناوچه‌كه و ئه‌گه‌ریشی هه‌یه هه‌ماهه‌نگی و په‌یوه‌ندی پته‌و له نێوان حكوومه‌تی عێراق و توركیا هه‌بێت بۆ ئه‌نجامدانی ئۆپه‌راسیۆنی هاوبه‌ش بۆ سه‌ر ناوچه سنوورییه‌كانی هه‌رێم و ڕووبه‌ڕووبوونه‌وه‌ی گه‌ریلاكانی په‌كه‌كه.
ناوبراو ئاشكراشی كرد: له دوای ڕووداوه‌كانی ڕیفراندۆمه‌كه‌ی 25ی ئه‌یلولی 2017 پیلانه‌كانی به‌غدا و ئه‌نقه‌ره به‌و جۆره بوووه كه له دوای عه‌فرین و كه‌ركووک ئۆپه‌راسیۆنی هاوبه‌ش بۆ قه‌ندیل ئه‌نجام بده‌ن و ئه‌و پیلانگێڕییه‌ش ئێستا ماوه و شێوازی جێبه‌جێ كردنه‌كه‌شی ده‌كه‌وێته سه‌ر هاوسه‌نگی هێز له ناوچه‌كه‌دا.
به‌وته‌ی ئه‌و په‌رله‌مانتاره‌ی عێراق چاوه‌ڕوان ده‌كرێت گۆڕانكاری گه‌وره ڕوو بدات و ده‌شڵێت: "ده‌بێت كورد ئاماده‌كاری پێویستی هه‌بێت هه‌رچه‌ند به‌داخه‌وه له ئێستادا له‌وپه‌ڕی په‌رته‌وازه‌ییدایه و ئه‌مه‌ش كێشه‌یێکی گه‌وره‌یه."
محه‌مه‌د عوسمان جه‌ختیشی له‌سه‌ر پیلانگێڕی عێراق و توركیا بۆ ئه‌نجامدانی ئۆپه‌راسیۆنی سه‌ربازی له خاكی هه‌رێم كرده‌وه و وتی: " ئه‌و ڕاستییه ڕوونه كه وڵاتانی ده‌وروبه‌ر هه‌میشه له پیلاندان له خاكی كوردستان."
کۆدی هه‌واڵنێر: 60103
Your Comment