به‌پێی هه‌واڵی کوردپرێس، توركیا خۆی بۆ هه‌ڵبژاردنی سه‌رۆكایه‌تیی كۆمار و هه‌ڵبژاردنی گشتی ئاماده‌ ده‌كات كه‌ بڕیاره‌ 24ی حوزه‌یرانی داهاتوو به‌ڕێوه ‌بچێت.

به‌پێی بڕیاری دامه‌زراوه‌ی باڵای هه‌ڵبژارن هه‌ر یه‌كه‌ له‌ پارته‌كانی ئاکپارتی، به‌ته‌په‌، به‌به‌په‌، جه‌هه‌په‌، ده‌په‌، هه‌ده‌په‌، ئیی پارتی، مه‌هه‌په‌، پارتی سه‌عاده‌ت، پارتی وه‌ته‌ن و هودا پار به‌شداری له‌ كێبڕكێی هه‌ڵبژاردندا ده‌كه‌ن.

سبه‌ی كاتژمێر 17:00 واده‌ی پێشكه‌ش كردنی لیستی ناوی كاندیدی پارت و قه‌واره‌ سیاسییه‌كان به‌ دامه‌زراوه‌ی باڵای هه‌ڵبژاردن كۆتایی دێت و پێویسته‌ ناوه‌ندی گشتیی هه‌ر پارت و قه‌واره‌یێكی سیاسی تا ئه‌و واده‌یه‌ په‌یوه‌ندی به‌ دامه‌زراوه‌كه‌وه‌ بكه‌ن.

هاوكات بڕیاره‌ كه‌موكوڕی به‌ڵگه‌نامه‌كانی كاندیدی پارته‌ سیاسییه‌كان و كاندیده‌ سه‌ربه‌خۆكان تا 25ی ئایار ته‌واو بكرێن.

26ی ئایاریش لیستی ناوی كاندیده‌كان له‌ ڕۆژنامه‌ی فه‌رمیدا بڵاو ده‌كرێته‌وه‌ و گازنده‌كانیش تا كاتژمێر 15:00ی ڕۆژی 27ی ئایار وه‌رده‌گیرێن و تا كاتژمێر 23:59 بڕیار له‌سه‌ر گازنده‌كان ده‌درێت.

سه‌رچاوه‌: ئه‌نادۆڵو

کۆدی هه‌واڵنێر: 60103