به‌پێی هه‌واڵی کوردپرێس، ئایه‌توڵڵا خامنه‌یی ڕێبه‌ری باڵای شۆڕشی ئێران سه‌رله‌به‌یانیی ئه‌مڕۆ له‌ زانکۆی فه‌رهه‌نگییاندا به‌ توندی ئیدانه‌ی بڕیاره‌که‌ی دۆناڵد تره‌مپی کرد که‌ شه‌وی ڕابردوو له‌سه‌ر کشانه‌وه‌ له‌ ڕێککه‌وتنی ئه‌تۆمیی ئێران و وڵاتانی 5+1 ده‌ریبڕی.

ئایه‌توڵڵا خامنه‌یی له‌و باره‌یه‌وه‌ ڕای‌گه‌یاند شه‌وی ڕابردوو بینوتان سه‌رۆک کۆماری ئه‌مریکا هه‌ندێک ورده‌قسه‌ی سووک و پووچه‌ڵی کرد. ڕه‌نگه‌ قسه‌کانی زیاتر له‌ ده‌ درۆی تێیدا بوو. تره‌مپ سیسته‌می هه‌ڕه‌شه‌ی له‌ سیسته‌می حوکمڕانی ئێرانیش کرد و هه‌ڕه‌شه‌ی له‌ گه‌لی ئێرانیش کرد و په‌نجه‌ی ڕاکێشا که‌ وا ئه‌که‌م و وا ناکه‌م بۆیه‌ من له‌ لایه‌ن گه‌لی ئێرانه‌وه‌ پێی ده‌ڵێم: "به‌ڕێز تره‌مپ! بێجای ناماقووڵت کرد".

ئایه‌توڵڵا خامنه‌یی به‌ به‌رده‌نگانی لێدوانه‌که‌ی وت: چاوه‌ڕێی ئه‌و ڕۆژه‌ بکه‌ن که‌ تره‌مپ مردوووه‌ و ته‌رمه‌که‌ی بۆته‌ خوراکی مار و مێروو به‌ڵام ده‌سه‌ڵاتی کۆماری ئیسلامیی ئێران زیندوووه‌.

ئایه‌توڵڵا خامنه‌یی ئه‌وه‌شی وه‌بیر هێنایه‌وه‌ که‌ ئه‌گه‌ر گه‌ره‌نتی و زه‌مانه‌تی پێویست و پشت‌ئه‌ستوور له‌ سێ وڵاتی ئه‌ورووپیی واژۆکاری ڕێککه‌وتنه‌که‌ وه‌رنه‌گیرێت به‌رده‌وام بوون و پارێزگاری کردن له‌ ڕێککه‌وتنه‌ ئه‌تۆمییه‌که‌ مه‌عقووڵ نییه‌.

شیاوی ئاماژه‌یه‌ شه‌وی ڕابردوو کاژمێر 10 و 45 خوله‌ک به‌ کاتی تاران و 2ی نیوه‌ڕۆ به‌ کاتی ئه‌مریکا دۆناڵد تره‌مپ سه‌رۆک کۆماری ئه‌مریکا بڕیاری دا به‌ کشانه‌وه‌ی واشنتۆن له‌ ڕێککه‌وتنی ئه‌تۆمیی نێوان ئێران و وڵاتانی 5+1 و ئه‌و بڕیاره‌ی تره‌مپیش کاردانه‌وه‌ی به‌رفراوانی ناوخۆیی و بیانی لێکه‌وته‌وه‌.

کۆدی هه‌واڵنێر: 60104