به‌پێی هه‌واڵی کوردپرێس، حاجی ڕه‌سووڵ خۆشناو به‌ڕێوه‌به‌ری گشتی له‌ گرووپی کۆمپانیاکانی خۆشناو به‌ تۆڕی میدیاییی ڕووداوی ڕاگه‌یاند: ڕۆژی دووشه‌ممه‌ 18ی مارچ یه‌که‌م گه‌شتی ئاسمانیی فلای ناس له‌ فڕۆکه‌خانه‌ی جه‌دده‌ بۆ فڕۆکه‌خانه‌ی نێوده‌وڵه‌تیی هه‌ولێر ئه‌نجام درا.

ناوبراو ڕاشی‌گه‌یاند: هه‌فتانه‌ چوار گه‌شت له‌ هه‌ولێر بۆ جه‌دده‌ و به‌ پێچه‌وانه‌شه‌وه‌ ئه‌نجام ده‌درێن و به‌رده‌وامیش ده‌بن.

به‌پێی ئه‌و زانیارییانه‌ی به‌ ڕووداو گه‌یشتوون هه‌ر ڕۆژی دووشه‌ممه‌ کاژێر 16:00 یه‌که‌م فڕۆکه‌ی هێڵی ئاسمانیی فلای دوبه‌ی به‌ زیاتر له‌ 100 سه‌رنشینه‌وه‌ ده‌گاته‌ فڕۆکه‌خانه‌ی نێوده‌وڵه‌تیی هه‌ولێر و هه‌مان ڕۆژ کاژێر 17:20 خوله‌ک له‌ هه‌ولێره‌وه‌ و به‌ 164 سه‌رنشینه‌وه‌ ده‌گه‌ڕێته‌وه‌ دوبه‌ی.

وه‌کوو کاردانه‌وه‌ به‌رامبه‌ر گشتپرسییی هه‌رێمی کوردستان، حکوومه‌تی عێراق 25ی ئه‌یلوولی 2017 کۆمه‌ڵێک سزای به‌ سه‌ر هه‌رێمی کوردستاندا سه‌پاند و یه‌کێک له‌ سزاکان ڕاگرتنی گه‌شته‌ نێوده‌وڵه‌تییه‌کانی هه‌ر دوو فڕۆکه‌خانه‌ نێوده‌وڵه‌تییه‌کانی هه‌لێر و سلێمانی بوو و دوای تێپه‌ڕبوونی 5 مانگ و نیویش به‌ سه‌ر داخستنیان به‌ فه‌رمانی حه‌یده‌ر عه‌بادی سه‌رۆک وه‌زیرانی عێراق له‌ ڕۆژی 15ی مارچ هه‌ر دوو فڕۆکه‌خانه‌که‌ کرانه‌وه‌.

کۆدی هه‌واڵنێر: 60103