به‌پێی هه‌واڵی کوردپرێس، مه‌نسوور به‌عیجی له به‌یاننامه‌یێکدا هۆشداری به ئه‌ردۆغان داوه سه‌باره‌ت به هه‌موو چه‌شنه ئۆپه‌راسیۆنێکی سه‌ربازی له باکووری عێراق به پاساوی به‌رپه‌رچدانه‌وه‌ی پارتی کرێکارانی کوردستان (PKK).
ناوبراو له به‌یاننامه‌که‌یدا داوای له ده‌وڵه‌تی فیدڕاڵ کردوووه ده‌ستبه‌جێ به‌رانبه‌ر به‌و ئۆپه‌راسیۆنه سه‌ربازییه‌ی تورکیا که هاوشێوه‌ی ئۆپه‌راسیۆنه‌که‌ی عه‌فرین له هه‌رێمی کوردستانیش ده‌یکات هه‌ڵوێست بنوێنێت.
ناوبراو جه‌ختی کرده‌وه بێده‌نگ بوونی به‌غدا له به‌رانبه‌ر هێرشه‌کانی تورکیا بۆ سه‌ر خاکی عێراق وای کردوووه تورکه‌کان به‌رده‌وام بن له هێرشه‌کانیان له نێو خاکی عێراق. هه‌ر بۆیه‌ش ده‌بێ به‌غدا له به‌رانبه‌ر دوژمنی بیانیدا به‌رگری له خاکی نیشتمان بکات.
ئه‌و په‌رله‌مانتاره‌ی عێراق له به‌یاننامه‌که‌یدا وتووشیه‌تی: ده‌بێت ده‌وڵه‌تی تورکیا باش تێبگات عێراق وڵاتێکی خاوه‌ن ده‌سه‌ڵاته و ده‌توانێت له به‌رانبه‌ر ده‌ستوه‌ردانی ئه‌نقه‌ره به‌رگری له خۆی بکات چوونکه مه‌ترسیی پێشێل کردنی ده‌سه‌ڵات و سه‌روه‌ریی عێراق له لایه‌ن تورکیاوه هیچی له مه‌ترسیی داعش که‌متر نییه و ده‌بێت ئه‌ردۆغان تێبگات ئاواته عوسمانییه‌کانی له نێو خاکی عێراق نایێته دی.
سه‌رچاوه: هه‌واڵده‌ریی "المعلومه"
کۆدی هه‌واڵنێر: 60104
Your Comment