برووسک حەسەکە وتەبێژی یەپەگە لە عەفرین لە لێدوانێک بۆ هەواڵنێری کوردپرێس لە عەفرین وێڕای ئاماژە بە دواهەم هەواڵی بەرەکانی شەڕی عەفرین وتی: تورکیا لە ئاسمان و وشکییەوە یەکسەر خەریکی بوردومانی بنکەکانمانە و دەیهەوێ لەسێبەری بوردومانەکاندا لەسەر زەوی پێشڕەوی بکات.

وتیشی: لە هەندێک میحوەردا پێشڕەوییان کردووە بەڵام هێزەکانمان هێشتاکەش خەریکی بەرگرین و بەرامبەر داگیرکارییەکانیان ڕاوەستاون.

وتەبێژی یەپەگە هەروەها باسی لەوە کرد سوپای تورکیا پێبەندی ئەخلاق نییە و خەڵکی سڤیلیش لە بوردومانەکاندا دەکاتە قوربانی و جەختی کردەوە: بە دڵنیاییەوە ئەو وڵاتانەی پستیوانی لە تورکیا دەکەن بەرپرسی کوشتاری خەڵکی بێتاوانن.

برووسک حەسەکە ئاشکرای کرد: سوپای ئازادی سووریا هەمان پاشماوەکانی گرووپە تیرۆریستییەکان و تەکفیرییەکانن و ئەوڕۆ بە ناوێکی دیکە هێرش دەکەنە سەر عەفرین.

ڕاشی‌گەیاند: سەرکەوتن هەر بۆ ئێمەیە و نیشانیان دەدەین ئێمە لایەنی حەقین و وەکوو گەلی سووریا بەرگری لە خاکی خۆمان دەکەین.

کۆدی هەواڵنێر: ٦٠١٠٥