بەپێی هەواڵی کوردپرێس، پرۆفیسۆر قەدری یڵدرم نوێنەری سێرت لە پارلەمانی تورکیا لە لیستی پارتی دیموکراتیکی گەلان لە لێدوانێکدا ئاماژەی کردە گۆڕانکارییەکانی عەفرین و دەری‌بڕی: وشەی عەفرین بە واتای "کەفی سابوون"ە. ناوەکەی لە ڕووباری عەفرین گیراوە و لە ئەرشیڤی عوسمانییەکانیشدا وەکوو کێوی کورد ناوی لێبراوە. کەواتە دەسەلمێت باوکانی ئێمە هەر لەوێ نیشتەجێ بوونە و لە ناوچەکەدا خۆجێیی بوون. ئەوڕۆکە ئەمریکا و ڕووسیا بەپێی بەرژەوەندیی خۆیان جاری وایە کورد و تورک ڕووبەڕووی یەک دەکەنەوە و ئەمەش زەبری داوەتە برایەتیی کورد و تورک.

لە درێژەدا ناوبراو ئاشکرای کرد: حکوومەتی تورکیا دەڵێت ئۆپەراسیۆنەکە دژ بە کورد نییە و دژ بە یەپەگە و یەپەژەیە، راستە ئێوە بەرنگاری ئەوان بوونەتەوە بەڵام لەبیریش مەکەن دایکان و باوکانی ئێمە و ئەوانەش کە ئێوە دژیان شەڕ دەکەن کوردن. ئەوەی گرینگە بردنی دۆخەکە بەرەو لایێکە کە کورد متمانە بە تورکیا بکات. دەنا هیچمان ناتوانین خۆمان لە گەمەکانی ئەمریکا و ڕووسیا ڕزگار بکەین.

سەرچاوە: ڕۆژنامەی دیوار

کۆدی هەواڵنێر: ٦٠١٠٥