به‌پێی هه‌واڵی کوردپرێس ڕۆژی ڕابردوو (سێشه‌ممه 2018.03.06) كۆسره‌ت ڕه‌سووڵ عه‌لی جێگری یه‌كه‌می سكرتێری گشتیی یه‌كێتیی نیشتمانیی كوردستان پێشوازی كرد له‌ خاتوو تون ئه‌لێرس به‌رپرسی باڵیۆزی شانشینی نه‌رویج له‌ ئۆردۆن و عێراق و خاتوو ئاناتیا گلوسن سكرتێری یه‌كه‌می باڵوێزخانه‌كه‌ له‌ ئۆردۆن.

له‌ دیداری نێوانیاندا، هه‌ر دوو لا باسیان له‌ بارودۆخی ناوخۆی عێراق و كوردستان و په‌یوه‌ندییه‌كانی نێوان هه‌رێم و به‌غدا كرد و ده‌ستووریان به‌ تاكه‌ بنه‌ما بۆ چاره‌سه‌ری كێشه‌كان زانی و بۆ دۆخی ناوخۆی كوردستانیش ته‌ئكید له‌ یه‌كڕیزی و یه‌ك گوتاری كورد كرایه‌وه‌.

ته‌وه‌رێكی‌تری دیداره‌كه‌ ته‌رخان كرا بۆ پرسی بودجه‌ی 2018ی عێراق و ده‌سته‌به‌ر كردنی مافه‌كانی كورد تێیدا و په‌یوه‌ست به‌م بابه‌ته‌ هه‌ر دوو لا جه‌ختیان له‌وه‌ كرده‌وه‌ كه‌ پێویسته‌ شایسته‌دارایییه‌كانی كورد دابین بكرێت و قوتی هاووڵاتییان نه‌كرێته‌ قوربانیی ململانێی سیاسی و هه‌موو لایه‌نه‌ سیاسییه‌كان به‌شدار بن له‌ بڕیاره‌ سیاسییه‌ چاره‌نووسسازه‌كان.

لای خۆیه‌وه‌ خاتوو تون ئه‌لێرس به‌شداریی كارای كوردی له‌ جه‌نگی به‌ره‌نگاربوونه‌وه‌ی تیرۆر به‌رز نرخاند و به‌ یه‌كێک له‌ هێزه‌ كاریگه‌ره‌كانی جه‌نگی دژی تیرۆری دایه‌ قه‌ڵه‌م و هاوكاری كردنی زیاتری پێشمه‌رگه‌ی به‌ گرنگ زانی.

سه‌رچاوه‌: PUK media

کۆدی هه‌واڵنێر: 60103