به‌پێی هه‌واڵی کوردپرێس، ڕۆژی ڕابردوو 2018.03.05 مه‌سروور بارزانی ڕاوێژكاری ئه‌نجومه‌نی ئاسایشی هه‌رێمی كوردستان له‌گه‌ڵ تۆن ئاله‌رس باڵیۆزی نوێی نه‌رویج بۆ ئۆردۆن و عێراق كۆ بوووه‌وه و له كۆبوونه‌وه‌كه‌دا باڵیۆزه‌كه‌ی نه‌رویج پێزانینی وڵاته‌که‌ی بۆ هه‌رێمی کوردستان و قوربانیدانی هێزی پێشمه‌رگه له جه‌نگی دژ به تیرۆر ڕاگه‌یاند و ئاماژه‌ی به‌وه دا که نه‌رویج به گرنگییه‌وه ده‌ڕوانێته ڕۆڵی هه‌رێمی كوردستان له ناوچه‌که‌دا و خوازیاری فراوانتر کردنی زیاتری په‌یوه‌ندیی دوو لایه‌نه‌یه له‌گه‌ڵ هه‌رێمی کوردستانن.
باڵیۆزی نه‌رویج پشتگیریی وڵاته‌که‌یشی بۆ دانووستانی نێوان هه‌ولێر و به‌غدا دووپات کردوووه و ئاواتی خواست هه‌رچی زووتر ئه‌م دانووستانانه ئه‌نجامی ئه‌رێنیی لێ بکه‌وێته‌وه.
لای خۆیه‌وه مه‌سروور بارزانی ڕای‌گه‌یاند: ده‌بێت کۆمه‌ڵگای نێوده‌وڵه‌تی کاراتر ئه‌رکه‌کانی له ناوچه‌که‌دا جێبه‌جێ بکات تاکوو زه‌مینه بۆ سه‌رهه‌ڵدانی توندوتیژی و گه‌شه کردنه‌وه‌ی تیرۆر نه‌ره‌خسێته‌وه.
ڕاوێژکاری ئه‌نجومه‌نی ئاسایشی هه‌رێمی کوردستان هیوای سه‌رکه‌وتنی بۆ خاتوو ئاله‌رس له پۆسته نوێیه‌که‌یدا خواست و ستایشی وڵاتی نه‌رویجی کرد بۆ ئه‌و پاڵپشتی و هاوکارییانه‌ی که له چوارچێوه‌ی هاوپه‌یمانیی نێوده‌وڵه‌تی دژ به داعشدا پێشکه‌شی هه‌رێمی کوردستانیان کردوووه.
کۆدی هه‌واڵنێر: 60103
Your Comment