بەپێی هەواڵی کوردپرێس، ئەمڕۆ ٥ی ٣، یادی دەستپێکی راپەڕینی ئازاری ساڵی ١٩٩١ی هاوڵاتیانی هەرێمی کوردستانە کە سەرەتا لە دەڤەری راپەڕین (رانیە و قەڵادزێ) دەستیپێکرد و لە ماوەی چەند رۆژێکی کەمدا تەواوی شارەکان بە حکوومەتی ئەوکاتەی عێراق چۆڵ کران هەربەم بۆنەوە بەرپرسان و کەسایەتییە سیاسییەکانی هەرێمی کوردستان چەند پەیامی جیاجیایان بڵاو کردەوە.
لە پەیامێکیدا بەبۆنەی یادی راپەڕینەوە، نێچیرڤان بارزانی، سەرۆکی هەرێمی کوردستان رایگەیاند، ئه‌مڕۆ کوردستان له هه‌موو کاتێک زياتر پێويستى به ته‌بايى و پێکه‌وه‌يى و يه‌کڕيزيى هه‌موو لايه‌ن و پێکهاته‌کانى هه‌يه. هاوکات، داوای یەکڕیزیی لە هەمووان دەکات.
سەرۆکی هەرێمی کوردستان ئاماژەی بەوەش کردووە، کوردستان پێویستی بە یەکڕیزیی هەیە تاوەکوو بتوانێت په‌يام و ئامانجه‌کانی ڕاپه‌ڕين و به‌رهه‌مى خوێنى شه‌هيدان بپارێزێت و به‌ره‌و ئاينده‌يێکى باشتر هه‌نگاو بنێت.
لە درێژەی پەیامەکەیدا، نێچیرڤان بارزانی دەڵێت: "وه‌ک چۆن له راپه‌ڕيندا ته‌واوى کوردستانييان به هه‌موو پێکهاته نه‌ته‌وه‌يى و ئاينييه‌کان و هه‌موو ئاراسته و هێز و لايه‌نه سياسييه جياکانه‌وه، له به‌ره‌يه‌کى يه‌کگرتوودا پێکه‌وه راپه‌ڕين و سه‌رکه‌وتين، ئێستاش به هه‌مان شێوه هه‌موومان پێکه‌وه ده‌توانين ڕووبه‌ڕووى سه‌ختى و ته‌حه‌دييه‌کان ببينه‌وه و مافه ده‌ستوورييه‌کانمان به‌ده‌ست بهێنين و بپارێزين".
دەشڵێت، "له‌م ياده پيرۆزه‌دا داوا له هه‌موو هێز و لايه‌ن و پێکهاته‌کانى کوردستان ده‌که‌م، يادى راپه‌ڕين بکه‌ينه هه‌وێنى ته‌بايى و پێکه‌وه‌يى و يه‌کڕيزى و نه‌هێشتنى کێشه و ناکۆکييه‌کان تا گيانى کاروانى شه‌هيدانى کوردستان شاد بکه‌ين و هه‌موومان پێکه‌وه به‌ره‌و داهاتوويه‌کى باشتر هه‌نگاو بنێين".
هەروەها بەرهەم ساڵح سەرۆک کۆماری عێراق، بەبۆنەی ساڵیادی راپەڕین پەیامێکی پیرۆزبایی ئاراستەی خەڵکی کوردستان کرد و تێیدا ئاماژەی بەوە کردووە، "پێویسته له‌م یاده‌دا به‌هاکانی راپه‌ڕین به‌رز رابگیرێن به رێزگرتن له داخوازی و مافه‌کانی خه‌ڵک، به‌کۆتایی هێنان به ناعه‌داله‌تی و گه‌نده‌ڵی، پێویسته به کرده‌وه گه‌ل سه‌رچاوه‌ی هه‌موو ده‌سه‌ڵات و شه‌رعیته‌کان بێت و خزمه‌ت کردنی هاوڵاتیان و به‌رجه‌سته کردنی به‌ها نیشتمانییه راسته‌قینه‌کان بکرێنه پێوه‌ری کارکردن."
بەرهەم ساڵح لەبەشێکی دیکەی پەیامەکەیدا وتوویەتی: "یادکردنه‌وه‌ی ئه‌م بۆنه پیرۆزه به‌وه ده‌کرێت که کار بکه‌ین بۆ به‌رقه‌رار کردنی حوکمڕانیێکی دروست به‌ئاراسته‌ی تێپه‌ڕاندنی قه‌یران و ئاسته‌نگه‌کان دوور له ململانێ و به‌رژه‌وه‌ندی حزبی به‌رته‌سک و به‌گژداچوونه‌وه‌ی گه‌نده‌ڵی و گه‌نده‌ڵکاران به کرده‌وه، ئه‌مه‌ش له رێگای به‌شداری راسته‌قینه‌ی خه‌ڵک و له‌به‌رچاوگرتنی داخوازیه ره‌واکانیان.
لای خۆیەوە مەسعوود بارزانی سەرۆکی پارتی دیموکراتی کوردستان بەبۆنەی راپەڕینەکەی خەڵکی کوردستان پەیامێکی بڵاو کردەوە و تێیدا وێڕای پیرۆزبایی بە بۆنەی سییەمین ساڵڕۆژی ڕاپەڕینی گەلی کوردستانەوە دەڵێت :پیرۆزبایی لە خانەوادەی سەربەرزی شەهیدان و پێشمەرگە قارەمانەکان و هەمو نیشتمانپەروەر و تێکۆشەر و ئازادیخوازان و سەرجەم چینوتوێژ و هاوڵاتیانی کوردستان دەکەم".
ناوبراو ئاماژەی بەوەش کردووە،" بەهیچ شێوەیەک نابێت ئامانج و دەستکەوتەکانی ڕاپەڕین بە لاڕێدا ببرێن."
لەبەشێکی دیکەی پەیامەکەیدا، مەسعوود بارزانی وتوویەتی: "گەلی کوردستان خەباتی کرد و خوێنی دا و ڕاپەڕی بۆ ئەوەی بە سەربەرزی بژیێت و هەر کەس و لایەنێکیش بیەوێت لە بەها و ئامانجەکانی ڕاپەڕین کەم بکاتەوە لە ڕاستیدا ناپاکی لە خوێنی شەهیدان و دەیان ساڵ خەبات و قوربانیدانی گەلی کوردستان دەکات".
هەروەها لە پەیامێکیدا بەهۆی یادی راپەڕینەوە، مەسروور بارزانی سەرۆکی حکوومەتی هەرێمی کوردستان رایگەیاند: "با یادی راپەڕین هاندەری زیاترمان بێت بۆ ئەوەی پشتيوانی حکوومەتی هەرێمی کوردستان بین".
لە درێژەی پەیامەکەیدا، سەرۆکی حکوومەت دەڵێت، هاندەر و پشتیوانی حکوومەت بن تا خزمەتێکی شایستەتر پێشکەشی سەرجەم خەڵکی کوردستان بکات و بەیەکەوە، هەرێمی کوردستان بەرەو قۆناغێکی گەشەسەندووتر ببەین.
دەشڵێت، راپەڕینی ئازاری ١٩٩١، بەرهەمی یەکڕیزی و یەکگرتوویی سەرجەم چین و پێکهاتەکانی گەلی کوردستان و هێز و لایەنە کوردستانییەکان بووە.
ئەوەشی وتووە، بەرهەمی راپەڕین دروست بوونی قەوارەی فیدراڵی هەرێمی کوردستان و دامەزراوە شەرعی و دەستوورییەکانی هەرێم بووە، "پێویستە ئەمڕۆش، هەر تاکێکی کوردستانی و هەموو لایەن وپێکهاتەكان، بە یەکڕيزی و یەکدەنگییەوە، داکۆکی لە دەسکەوتە نیشتمانییەکان و مافە دەستوورییەکانی گەلی کوردستان بکەن".
لاهور شێخ جەنگی هاوسەرۆکی یەکێتی نیشتیمانی کوردستان لە پەیامەکەیدا ئاماژەی بەوە کردووە،" راپه‌ڕین، به‌رهه‌می خوێنی ده‌یان هه‌زار شه‌هید، به‌رئه‌نجامی شۆڕشی نوێ و بەشداریی و پشتیوانیی کارایانەی کۆمەڵانی خەڵک و چه‌پكه گوڵی هه‌ڤاڵ مام جه‌لال بوو بۆ گه‌لی كوردستان."
هاوسەرۆکی یەکێتی ئاماژەی بەوەش کردووە "به‌ها باڵا سیاسی و كۆمه‌ڵایه‌تییه‌كانی یه‌كێتی، هیواكانی خه‌باتی رزگاریی نیشتمانی و ده‌سكه‌وته‌كانی راپه‌ڕین - كه ده‌یان هه‌زار شه‌هید و تێكۆشه‌ری قاره‌مان گیانی خۆیان له‌پێناو به‌خشی، چییان لێ دێت. كێ كوردستانه‌كه‌مان له داگیركاری، له مشه‌خۆری و قۆرغكاریی ده‌سه‌ڵاتێكی ناپه‌سه‌ند ده‌پارێزێ و رزگار ده‌كات.
ناوبراو دەشڵێ ئه‌مڕۆ و30 ساڵ دوای راپه‌ڕین، خه‌ڵكی كوردستان ده‌یانه‌وێت دڵنیابن كه سه‌روه‌ریی یاسا و ئازادییه‌كان، ئاسایشی كار و پیشه‌یان، مووچه و قووت و كه‌سابه‌ت و ژیانیان، له‌ده‌ست كه‌مینه‌یه‌كی مشه‌خۆر، پارێزراو بێت".
کۆدی هەواڵنێر: 60113
Your Comment