به‌پێی هه‌واڵی کوردپرێس، ژماره‌یێک له په‌رله‌مانتار و لایه‌نی سیاسیی هه‌رێمی كوردستان داوایان له سه‌رۆک كۆماری عێراق كردوووه مافی ڤیتۆ به كار بهێنێت و یاسای په‌سه‌ندكراوی بودجه‌ی 2018 واژۆ نه‌كات و بیگه‌ڕێنێته‌وه بۆ ئه‌نجومه‌نی نوێنه‌رانی عێراق.
له وه‌ڵامی ئه‌و داوایانه، د. عه‌بدوڵڵا عه‌لیاوه‌یی ڕاوێژكاری سه‌رۆكایه‌تیی كۆماری عێراق به SNNی ڕاگه‌یاند: به‌پێی یاسا، سه‌رۆک كۆمار ناتوانێت ڤیتۆ له دژی یاسای بودجه به كار بهێنێت و ده‌سه‌ڵاتی ئه‌وه‌شی نییه یاساكه بگه‌ڕێنێته‌وه بۆ په‌رله‌مان.
داواكه‌ی چه‌ند په‌رله‌مانتارێكی كورد له سه‌رۆک كۆمار بۆ ڕه‌ت كردنه‌وه‌ی پرۆژه‌یاسای په‌سه‌ندكراوی بودجه بۆ ئه‌وه ده‌گه‌ڕێته‌وه كه مافی كوردی تێدا ڕه‌چاو نه‌كراوه و داواكارییه‌كانی هه‌رێمی كوردستانیشی له زیاد كردنی به‌شه‌بودجه‌ی هه‌رێم فه‌رامۆش كردوووه.
عه‌بدوڵڵا عه‌لیاوه‌یی وتیشی: "سه‌رۆک كۆمار ته‌نها ده‌توانێت واژۆ كردن له‌سه‌ر یاساكه دوا بخات ئه‌وه‌ش كاریگه‌رییێكی ئه‌وتۆی نابێت چوونكه له‌م هه‌فته‌یه‌وه یاساكه ده‌خرێته بواری جێبه‌جێ كردنه‌وه و ئه‌نجومه‌نی نوێنه‌رانیش كه پرۆژه‌یاساكه‌ی په‌سه‌ند كردوووه له سه‌رووی هه‌موو ده‌سه‌ڵاته‌كانه‌وه‌یه".
کۆدی هه‌واڵنێر: 60103
Your Comment