بەپێی هەواڵی کوردپرێس، ڕۆژی ڕابردوو پارلەمانی هۆڵەندا ڕووداوەکانی ساڵی ١٩١٥ کوشتاری ئەرمەنییەکان لە سەردەمی حکوومەتی عوسمانیی وەکوو ژینۆساید ناسی ئەوەش بە ١٤٢دەنگی ئەرێنی هەمبەر ٣ دەنگی نەرێنی.
حکوومەتی تورکیا هیچ کاتێک ئەو ئیدیعایەی قبووڵ نەکردووە و بەو جۆرە باس لە ڕووداوەکە دەکات کە گوایە ئەرمەنییەکان پشتیان بە ڕووسیا بەستووە و لە شەڕی نێوانیاندا هەردوو لایەن خەساریان بینیوە. ئەمەش لە حاڵێکدایە کۆمەڵگای ئەرمەنییەکان لەو بڕوایەدان کوشتاری ساڵی ١٩١٥ پیلانێکی داڕێژراو بووە و تێیدا زیاتر لە یەک ملیۆن ئەرمەنی کوژراون.
حکوومەتی هۆڵەندا لەمبارەوە ڕای‌گەیاندووە بڕیارەکەی پارلەمان هیچ سنوورێکی بۆ دروست ناکات و تەنیا ئەو هەڵمەتانە بە ژینۆساید دەناسێت کە لەلایەن نەتەوە یەکگرتووەکانەوە و بە حوکمی دادگای نێونەتەوەیی پشتڕاست کرابێتەوە.
وەزارەتی دەرەوەی تورکیاش بڕیارەکەی پارلەمانی هۆڵەندای ئیدانە کرد و ڕایگەیاند: ئەم بڕیارە هیچ بنەمایێکی یاساییی نییە و لە وڵاتێکدا دەردەچێت کە هەمبەر ژینۆساید و کۆمەڵکوژیی سێربرێنیتسا لە ناودڵی ئەورووپا بێدەنگە.
کۆدی هەواڵنێر: ٦٠١٠٥
Your Comment