به‌پێی هه‌واڵی کوردپرێس، سه‌عد حه‌دیسی له پرێس کۆنفڕانسێکدا ئاماژه به‌وه ده‌کات حکوومه‌تی عێراق دوا ھه‌ڵوێستی خۆی سه‌باره‌ت به ڕێککه‌وتنه نه‌وتییه‌کان له‌گه‌ڵ ھه‌رێمی کوردستان ئاشکرا ده‌کات و ڕای‌ده‌گه‌یێنێت: له دوا کۆبوونه‌وه‌ی عه‌بادی و سه‌رۆکی حکوومه‌تی ھه‌رێم ته‌ئکید له چاره‌سه‌ر کردنی کێشه‌کانی نێوان ھه‌رێم و به‌غدا له‌باره‌ی نه‌وت و کێڵگه نه‌وتییه‌کانی ھه‌رێم کراوه‌ته‌وه.
سه‌عد حه‌دیسی ته‌ئکیدی کردۆته‌وه: ئه‌و دۆسیانه‌ی تایبه‌تن به ده‌سه‌ڵاتی ئیتحادییه‌وه ده‌بێت بخرێنه ژێر سیاده‌ی حکوومه‌تی عێراقه‌وه جگه له‌وه‌ش پێویسته سه‌رجه‌م ئه‌و گرێبه‌ستانه‌ی ئه‌نجام ده‌درێن له‌ژێر کۆنتڕۆڵ و سیاده‌ی عێراق و وه‌زاره‌تی نه‌وتدا بن به‌ده‌ر له‌وه‌ش عێراق ھیچ به‌رپرسیارێتیێک ناگرێته ئه‌ستۆ.
حه‌دیسی ئه‌وه‌شی ئاشکرا کردوه لیژنه‌یێکی ھونه‌ری و تایبه‌تمه‌ندی سه‌ر به کۆمپانیای سۆمۆ و لیژنه‌ی تایبه‌ت به وزه له ئه‌نجومه‌نی وه‌زیران له‌گه‌ڵ چه‌ند لیژنه‌یێکی په‌یوه‌ندیدار به حکوومه‌تی ھه‌رێم پێکھێنراوه بۆ چۆنێتیی کارا کردنه‌وه‌ی ئه‌و ڕێککه‌وتنانه‌ی پێشتر له نێوان ھه‌ر دوو لا ئه‌نجام دراوه و نه‌توانراوه جێبه‌جێ بکرێت.
ناوبراو ده‌شڵێت: ئێستا بارودۆخ گونجاوه بۆ ڕێککه‌وتن له‌سه‌ر دۆسێکان و به تایبه‌ت گۆڕانکاریی ھه‌ڵوێستی حکوومه‌تی ھه‌رێم سه‌باره‌ت به ڕێزگرتن له ده‌ستور و بڕیاری دادگای فیدراڵی سه‌باره‌ت به ڕیفراندۆم.
سه‌رچاوه: هه‌واڵده‌ریی "اسکای پرس"
کۆدی هه‌واڵنێر: 60103
Your Comment