به‌پێی هه‌واڵی کوردپرێس، هووشه‌نگ بازوه‌ند له‌ دانیشتنێکی ئیداره‌ی پارێزگاریی کرماشاندا له‌و باره‌یه‌وه‌ گوتی: ئه‌و کرێچییانه‌ له‌ گونده‌کانن بڕی 30 میلیۆن تمه‌ن و ئه‌وانه‌ش له‌ شارن بڕی 40 میلیۆن تمه‌ن قه‌رزی بانکی وه‌رده‌گرن.

ناوبراو زیادی کرد: به‌ گوێره‌ی پلانێکی پێشکه‌ش‌کراو له‌لایه‌ن که‌رتی خانووبه‌ره‌وه‌ ده‌بێت له‌ ماوه‌ی یه‌ک حه‌فته‌دا 600 هه‌یکه‌لی خانوو چێ بکرێت و به‌ وردیش به‌دواداچوون بۆ ئه‌و به‌ڵێنه‌ ده‌که‌ین.

ناوبراو ئاشکراشی کرد: تا ئێستا 3541 بنه‌ڕه‌تی یه‌که‌ی نیشته‌جێبوون له‌ گونده‌کان ئاماده‌ کراوه‌ و له‌مه‌وبه‌دواش هه‌موو حه‌فته‌یێک 1500 خانوو به‌و ئاماره‌ زیاد ده‌بێت.

بازوه‌ند گوتیشی: 1000 میلیارد تمه‌ن ئاسانکاری و قه‌رزی بانکی بۆ یارمه‌تیدانی یه‌که‌ پیشه‌یی و خزمه‌تگوزاری و گه‌شتیارییه‌کان ته‌رخان کراوه‌ و به‌دواداچوونیشی بۆ ده‌که‌ین.

شیاوی ئاماژه‌یه‌؛ بوومه‌له‌رزه‌یێکی 7.3 ڕیخته‌ری شه‌وی 21ی گه‌ڵاڕێزان ناوچه‌ی کرماشانی هه‌ژاند و پاش ئاماری دژبه‌یه‌کی زۆر له‌ ئاکامدا به‌ گوێره‌ی ئاماری فه‌رمیی ڕاگه‌یێندراو 620 هاووڵاتی له‌و بوومه‌له‌رزه‌یه‌دا گیانی خۆیان له‌ده‌ست دا و 12 هه‌زار و 386 برینداریشی لێکه‌وته‌وه‌. بوومه‌له‌رزه‌که‌ خه‌ساری به‌ 10 شار و 1930 گوندی پارێزگای کرماشان گه‌یاندوووه‌ و به‌ گوێره‌ی ئه‌و خه‌مڵاندنه‌ی ئه‌نجام دراوه‌ نزیک به‌ 90 هه‌زار یه‌که‌ی نیشته‌جێ بوونی شار و گوندی ناوچه‌که‌ خه‌ساری سووک و قورسیان لێکه‌وتوووه‌.

ڕه‌وتی ئاسانکاری کردن و یارمه‌تی گه‌یاندن به‌ خه‌ڵکی لێقۆماوی بوومه‌له‌رزه‌که‌ی کرماشان ڕه‌خنه‌ی زۆری له‌سه‌ره‌ و تا ئێستا نوێنه‌رانی ناوچه‌که‌ چه‌ندین جار به‌رانبه‌ر به‌ خه‌مساردیی ده‌وڵه‌ت له‌و باره‌یه‌وه‌ به‌ شێوازی جیا جیا ناڕه‌زایییان ده‌ربڕیوه‌ ئه‌مه‌ش چه‌ندین جاره‌ به‌رپرسان وه‌عده‌ و وه‌عید و به‌ڵێنی جۆربه‌جۆر ده‌ده‌ن به‌ڵام ئه‌وه‌ی ده‌بینرێت به‌ وته‌ی نوێنه‌ره‌کان داموده‌زگای جێبه‌جێکار و به‌ تایبه‌ت بانکه‌کان مل به‌ ئاسانکاری کردن بۆ پێدانی قه‌رز و یارمه‌تی ناده‌ن.

کۆدی هه‌واڵنێر: 60103