بەپێی هەواڵی کوردپرێس، رەجەب تەیب ئەردۆغان سەرۆک کۆماری تورکیا پەیامێکی ڤیدیۆیی ئاراستەی ئەو پرۆگرامە کرد کە بەبۆنەی دەستپێکردنی پەخشی کەناڵی تەلەڤیزیۆنی کۆمیتەی ئاراستەکردنی نیشتمانی تورک- ئەمریکا رێکخراوە.

ئەردۆغان لەبارەی بەرەنگاربوونەوەی پەکەکە گوتی: "بە تایبەتی لەبارەی بەرەنگاربوونەوەی رێکخراوی تیرۆریستی پەکەکە و درێژکراوەکانی، ئەو پشتیوانییەی ئارەزوومان دەکرد لە ھاوپەیمانی ناتۆ پێنەگەیشت".

سەرکۆماری تورکیا، ئەوەشی خستەڕوو کە لە چوارچێوەی روانگەیێکی درێژمەودا دەیانەوێت لەگەڵ ئیدارەی نوێی ئەمریکا ھەماھەنگیان بەھێزتر بکەن.

ئەردۆغان بەرپرسانی ئەمریکی کردە بەردەنگ و گوتیشی: "باوەش کردنەوە بۆ کوودەتاچییەکان بە شێوەیێکی ئەنقەست لەلایەن وڵاتێک کە خاوەن بانگەشەیە لە بواری دیمۆکراسی و ئازادییەکان، دژبەیەکێکی گەورەیە".

ئەردۆغان باسی لە رووداوی ھەڵکوتانە سەر کۆنگرێسی ئەمریکا کرد و ڕایگەیاند: "ئەوانەی دەستپێشخەریان بۆ رووداوە قێزەونەکەی سەر کۆنگرێسی ئەمریکا کرد، پەیوندییان ئاشکرا بووە لەگەڵ یەپەگە/پەیەدە وەک باڵی رێکخراوی تیرۆریستی جوداخواز (پەکەکە) لە سووریا".

رەجەب تەیب ئەردۆغان گوتیشی: "بەم ھێرشەوە دووبارە ئەوە زانرایەوە کە تیرۆر دوژمنی مرۆڤایەتی و دیموکراسییە".

سەرکۆماری تورکیا، لەبارەی پەیوەندییەکانی تورکیا و ئەمریکا گوتی: "لەم قۆناغەی دوایدا ھەموومان پێکەوە شاھیدی ئەوە بووین کە دۆستایەتی تورک-ئەمریکا بە تاقی کردنەوەیێکی جیددی تێپەڕبوو".

ئەردۆغان گوتیشی: "نە لە داھاتووی وڵاتەکەمان و نە لە داھاتووی ناوچەکەماندا، شوێنی بکوژانی دەست بە خوێنی وەک داعش، پەکەکە، فەتۆ و یەپەگە بوونی نییە".

ئەردۆغان راشیگەیاند: "ئێمە وەک تورکیا، لەو باوەڕەداین کە بەرژەوەندییە ھاوبەشەکانمان زۆر زیاترە لە بۆچوونە جیاوازەکانمان لەگەڵ ئەمریکا".

ئەردۆغان لە کۆتایی پەیامەکەیدا گوتیشی: "پێویستە کۆمەڵگەی تورک کاردانەوەی خۆی بەرامبەر ھەر چالاکی و بڵاوکراوەیێک نیشان بدات کە کاریگەری لەسەر تێگەیشتنی تورکیادا ھەیە".

کۆدی هەواڵنێر: 60113