به‌پێی هه‌واڵی کوردپرێس، لە دوای کۆبوونەوەیان لەگەڵ گرووپی پشتیوانی لە عەفرین لە نووسینگەی ئەنجومەنی نوێنەرانی عێراق لە سلێمانی، ئەمین بەکر، ئەندامی ئەنجومەنی نوێنەران بە خەندان-ی ڕاگەیاند: "لەشکرکێشییەکانی سوپای تورکیا بۆ سەر کانتۆنی عەفرین زۆرینەی فراکسیۆنە کوردییەکانی یەکخستوووە کە لە کۆبوونەوەیێکی پەڕلەماندا داوای ئیدانە کردن و ڕاگرتنی ئۆپەراسیۆنەکان بکرێت".

دەربارەی داخستنی دەروازە سنوورییەکانی هه‌رێمی کوردستان لەگەڵ سووریا ئەو پەرلەمانتارە وتی: "ئەرکی حکوومەتی ھەرێمی کوردستانە دەروازەی سنووری پێشخابوور و سیمێلکا بکاتەوە، چونکە ھۆکاری داخستنی ھیچ پاساوێکی یاسایی نییە، داخستنی ئەو دەروازانە سوود بە بەرژەوەندییەکانی وڵاتی تورکیا دەگەیێنێت، لە کاتێکدا ئەوە ڕاستەخۆ گەمارۆدانی خەڵکی ڕۆژئاوای کوردستانە".

ئەمین بەکر وتیشی: ھیچ جێگەی قبووڵ کردن نییە ڕێگە بدرێت بە ھێزێکی وەک ئەنجومەنی نیشتمانیی کورد لە سووریا "ئەنەکەسە" کۆنتڕۆڵی دەروازە سنوورییەکان و ھاتوچۆی ھاووڵاتییانی لە ژێر دەستدا بێت کە سنووری چالاکیی سیاسی لە نێوخۆی وڵاتی سووریا.

ئەو ئەندامەی ئەنجومەنی نوێنەرانی عێراق ئەوەشی خستەڕوو: "ئەگەر حکوومەتی ھەرێمی کوردستان دەروازەکانی لەگەڵ ڕۆژئاوای کوردستان نەکاتەوە، ئەوە لە پەرلەمانی عێراق فشار دروست دەکەین تا بڕیارێکی سیاسی لە بارەی کردنەوەی دەروازەکان بدرێت".

سه‌رچاوه‌: خه‌ندان

کۆدی هه‌واڵنێر: 60104