به‌پێی هه‌واڵی کوردپرێس، که‌ماڵ قڵیچدار ئۆغڵۆ ڕێبه‌ری پارتی کۆماریخوازی گه‌لی تورکیا (CHP) ڕه‌خنه‌ی له‌ ئامانجی حکوومه‌تی تورکیا له‌مه‌ڕ درێژکردنه‌وه‌ی ماوه‌ی دۆخی نائاسایی گرت و وتی: حکوومه‌ت له‌م دۆخه‌ بۆ سه‌رکوت کردنی ئۆپۆزسیۆن و بێده‌نگ کردنی دژبه‌ران که‌ڵک وه‌رده‌گرێت.

قڵیچدار ئۆغڵۆ له‌ کۆبوونه‌وه‌ی حه‌فتانه‌ی گرووپی په‌رله‌مانیی CHP وتی: "یاسای دۆخی نائاسایی درێژ ده‌کرێته‌وه‌. په‌رله‌مان ماوه‌یێکه‌ ده‌وری نه‌ماوه‌."

ناوبراو ئاماژه‌ی دایه‌ گفتوگۆی له‌گه‌ڵ بیناڵی ییڵدرم سه‌رۆک‌وه‌زیرانی تورکیا پاش کووده‌تای 15ی جووڵای 2016 و وتی: "له‌ کاتی یه‌که‌مین ڕاگه‌یاندنی دۆخی نائاسایی، ئه‌وان به‌ منیان وت ده‌یانه‌وێت بۆ ماوه‌یێکی کورت یاسای دۆخی نائاسایی به‌کار بهێنن."

به‌کر بۆزداغ جێگری سه‌رۆک‌وه‌زیران و وته‌بێژی ده‌وڵه‌تی تورکیا ڕای‌گه‌یاند: ده‌وڵه‌ت ده‌یه‌وێت جارێکی دیکه ماوه‌که‌ی‌ یاسای دۆخی نائاسایی درێژه‌ بکاته‌وه‌.

قڵیچدار ئۆغڵۆ وتیشی: "بۆچی ماوه‌ی یاسای دۆخی نائاسایی درێژه‌ ده‌که‌نه‌وه‌؟ ئه‌گه‌ر بۆ به‌ره‌نگاربوونه‌وه‌ی [ڕێکخراوی تیرۆریستیی فه‌تحوڵڵا گوله‌ن] FETOوه‌، ماوه‌که‌ی درێژه‌ بکه‌نه‌وه‌. که‌سێک بۆ به‌ره‌نگاربوونه‌وه‌ی فێتۆ ڕێگری ئێوه‌ بوووه‌؟ به‌ڵام ئه‌وان به‌ته‌واوه‌تی پێچه‌وانه‌ی ئه‌وه‌ کار ده‌که‌ن. ئه‌وان دژی ئۆپۆزسیۆنن و به‌ره‌نگاری FETO نابنه‌وه‌."

ناوبراو تورکیای به‌ زیندانێکی گه‌وره‌ ناو برد و زیادی کرد: حکوومه‌ت میدیاکان، ڕۆژنامه‌وانان و سه‌رکرده‌ی ڕێکخراوه‌ مه‌ده‌نییه ڕه‌خنه‌گر و دژبه‌ره‌کان سه‌رکه‌وت ده‌کات.

سه‌رچاوه‌: حوڕییه‌ت

کۆدی هه‌واڵنێر: 60104